首页> 新闻中心> 媒体名家> 正文
 
[英超] 东方:3大森巴兵打甩停賽令 利物浦踩油進擊列斯聯
2021年09月12日18:23 東方
 
 
周日晚英超焦點之戰,列斯聯主場對利物浦,列斯聯主帥比爾沙崇尚進攻足球,但防守卻非常鬆散,往往前面入埋唔夠後面輸,導致成績未如理想。至於利物浦不但人腳質素勝一籌,而且擅長快速反擊,正好剋住對手防線「輕出」嘅弱點,加上紅軍跨季近8場聯賽作客取得7勝1和,有力再下一城,客勝值得捧場。

(Now 621及611周日晚11時30分直播)

列斯聯上季升上英超後,憑大踢進攻足球,令人眼前一亮,包括上年9月作客利物浦,鬥攻之下,僅負3比4。無可否認,呢種戰術非常悅目,獲得好多觀眾支持,但卻欠缺實際,特別係遇上強隊嘅時候,仍然採用主攻,不顧防守,只會自暴其短,最佳例子莫過於今季首輪聯賽,列斯聯作客同曼聯鬥攻,結果大敗1比5,充分暴露出列斯聯踢法有前無後嘅弊病。

另外,列斯聯首席射手班福特今季腳風唔多順,踢3場聯賽僅入1球,列斯聯現時可以話係攻不銳、守不穩,開季後3場聯賽都未贏過,絕非冇道理。

沙拿專破列斯聯大門
至於利物浦今季有中堅華基爾雲迪積克復出,表現明顯比上季穩定,3場聯賽2勝1和,當中打和1場嘅對手係勁旅車路士,賽果合理,今場面對實力次一級嘅列斯聯,預料紅軍可佔上風。特別係紅軍前鋒穆罕默德沙拿、沙迪奧文尼速度快,列斯聯防線壓得太前,必令兩人有大量打反擊嘅機會,沙拿上季兩次對列斯聯合共射入3球,今場有力再數胡。

利物浦仲有好消息,早前因為缺席國際賽,遭國際足協罰停賽5日嘅3位巴西國腳法賓奴泰華利斯、艾利臣比加、羅拔圖法明奴,經過一番周旋最終打得甩,唔需要停賽,紅軍人腳齊整,客勝值博。

>>请看足球比分直播
 
(杰杰)  
 
 
 
≡ 相关链接 ≡